مركز تجميل منتدى الروعه

[هاجر]

لتنحيف الساقين والسمانة الممتلئة
دة سر من اسرار عارضات الازياء طبعا عارفين ان ارجلهم لازم تبقى رفيعة جدا وعمليات شفط الدهون خطر بعد الركبتين فطبعا دى طريقة هايلة لتنحيف الساقين الممتلئتين ولتخفيف حجم دهون السمانة
المكونات
3 ملاعق بن
نص كوب ما ساخن
الطريقة
اخلطيهم جيدا وادهنى المنطقة المرادة بحركة دائرية مع عقارب الساعة لمدة ربع ساعة بعد الشطف بتحسى ظهور دهون على المنطقة عادى اشطفيها وكررى الموضوع دة كل يوم لغاية القدم ما تنحف
بنات بعدين هقولكم على ماسكات جميلة من البن

[هاجر]

تبييض الأسنان ..بالطرق الطبيعية


ناصعة ..بالطرق الطبيعية
اول طريقة دعك الاسنان بنصف لمونة يوميا بس دة للثة القوية يعنى بعد استعمال الغرغرة
قطعة خبز محروقة او توست محروق على النار واطحنيها كويس وحطى عليها نص معلقة عسل وادعكى الاسنان بيها على فكرة الطريقة دى بتبان من اول مرة بتلاقى الاسنان ابيضت جدا
استخدام بيكربونات الصودا دعك الاسنان بيها وتو ضع على الفرشاة زى المعجون وبرضة من اول استخدام هتلاقى بياض غير عادى ومع الاستمرار بتلاقى الاسنان اصبحت بيضاء تماما مثل الثلج
قشرة برتقال وقشرة لمون اتركيهم ينشفوا خالص وبعدين اطحنيهم وحطى نفس الكمية بيكربونات صودا واخلطيهم وحطيهم فى علبة الطريقة دى غير البياض بتدى الفم رائحة جميلة جدا وبرضة بياض غير عادى ومع الاستمرار عارفين البياض اللى بيعملوة الاطباء بالليزر هتلاقى نفس النتيجة
فرك الاسنان بقطعة لحم مشوية على فكرة الطريقة دى من اسرار عارضات الازياء بس طبعا لحم مشوى على طول كدة احنا بنشوفة من العيد الكبير للعيد الكبير ههههههه المهم برضة نتيجتها خيالية ومش هتصدقوها
استخدام ماء الاكسجين المخفف نشترى ماء اكسجين من الصيدلية ونخففة بنسبة معلقة اكسجين صغيرة ومعلقة ماء ورد صغيرة ودعك الاسنان بقطنة مرتين فى اليوم طبعا الطريقة دى كمان للى اللثة عندهم سليمة يعنى بعد استعمال الغرغرة بفترة والطريقة دى كمان تحفة نتيجتها جميلة
عشب المريمية تاخدى الاوراق وتحرقيها على النار وتطحنيها وتدعكى الاسنان بيها مرة فى اليوم واتفرجى بقى البياض
المريمية دى بموت فيها ليها مليون فايدة هنزلها باذن الله فى موضوع تانى علشان كلنا نستفاد منها

[هاجر]

خلطة بقول .. مش معقول


خلطة البقول
طبعا كلنا عارفين ان البقول المطحونة رهيبة للبشرة والجسم ودى خلطة رائعة للماسك وللجسم يعنى ممكن نعملها ماسك للجسم كلة او الوجة بس لو للجسم بنسبها تنشف كويس ونفركها بالليفة المغربى ولو للوجة بنحطها نص ساعة ونفركها فرك خفيف ونتيجتها بتبان برضة من اول مرة ومع الاستمرار شهر بس مرتين فى الاسبوع هتشوفوا جمال الوجة ونضارتة واختفاء البقع وتخفيف الحبوب معلش هى مكوناتة غريبة شوية بس هسبكم للتجربة وكاالعادة روحى عند العطار وخلية يوزن الكميات بالضبط ويطحنها او خديها حبوب واطحنيها انتى فى البيت ومتكسلوش يا جماعة دى طريقة سهلة ورخيصة وسريعة ونتيجتها اقوى من اى كريمات غالية وبقولكم هتشوفوا النتيجة من اول مرة
المكونات
100 جرام عدس اصفر
50 جرام فول مقشر ابيض يعنى
50 جرام حلبة
الطريقة
يطحنوا جيدا زى البودرة ويوضع فى علبة وطريقة الاستخدام معلقة كبيرة من الخلطة تعجن بماء ورد او لبن للبشرة الجافة وتفرد على الوجة والرقبة او اى مكان نص ساعة للوجة وساعتين للجسم ثم تزال بطريقة الفرك الخفيف ويشطف الوجة جيدا بالماء الدافى ثم البارد

[هاجر]

ماسك الشوفان المنقوع


ماسك الشوفان المنقوع
دا ماسك جميل جدا للوجة والجسم وبعدين معلش الاول عايز اقول على حاجة كتير سمعتها من ناس لما يسمعوا منى كلمة شوفان الاقيهم يطنشوا لانهم بيفتكروا الشوفان دة حاجة غالية او صعبة او مش موجودة يا جماعة الشوفان رخيص جدا برغم فوايدة الهايلة يعنى الاوقية منة ب2 جنية والاوقية بتعمل مرتين وشكلة زى الكورن فليكس بس لازم نطحنة فى البيت زى البودرة الشوفان رائع رائع لتنضيف البشرة وتفتيح المسام والتخلص من الحبوب السودة على الانف ورهيب للسنفرة وتحفة للتبيض يعنى فوايدة لا تعد ولا تحصى
المهم دى الطريقة جربوها ومش هتندموا هتحبوها جدا
الطريقة
2 معلقة شوفان
نص كوب لبن بارد
ينقع الشوفان فى اللبن من بالليل للصبح ويفرد على الوجة والرقبة لمدة نص ساعة ويزال بطريقة الفرك الخفيف وعلى فكرة النتيجة من اول مرة بتبان وبعدين يشطف بالماء الدافى ثم البارد

[هاجر]

ماسك .. بالطين


فوائد الطين ..
وبالنسبة لفوايد الطين فهى فوايد جميلة جدا جدا لان الطين يحتوى على املاح معدنية مفيدة جدا للبشرة وبتساعد على تفتيح ونقاء البشرة والجسم وازالة البقع وتوحيد لون البشرة ويوجد الطين فى الاسواق على عدة اشكال منها الصابون الجاهز الذى يحتوى على الطين ومنها الحجر ومنها المطحون جاهز
اما عن الطريقة الامثل للاستخدام يفضل شراء الطين حجر افضل من المطحون حتى لا يغش وطحنة فى المنزل او شراءة مطحون من عطار مضمون والطين يستخدم كماسك للوجة والجسم مرة واحدة فقط كل عشرة ايام او اسبوعين لانة ممكن ان يؤدى الى جفاف للبشرة لما للطين من قدرة على امتصاص الزيوت الطبيعية الموجودة على البشرة
وطرق الاستخدام كاالتالى
2 معلقة طين + 2 معلقة ماء ورد ساخن +1 معلقة زيت لوز حلو للبشرة الجافة والعادية
2 معلقة طين +معلقة زبادى +معلقة زيت لوز حلو +2 معلقة ماء ورد ساخن للبشرة الحساسة
2 معلقة طين+معلقة لبن+معلقة ماء ورد ساخن+ بياض بيضة للبشرة الدهنية
يستخدم الماسك لمدة 20 دقيقة ثم يشطف بماء دافى ثم بارد يجب غسل الوجة جيدا لان ماسك الطين لو اقفلت المسامات على بقايا منة يمكن ان يؤدى ذلك لظهور الحبوب وبعد الغسل الجيد يفضل تمرير قطعة تلج على الوجة لقفل المسامات النظيفة
اما بالنسبة لاستخدامى للجسم يخلط بنسب متساوية من اللبن البودرة وزيت اللوز وماء الورد الساخن ثم يدهن الجسم لمدة ساعة حتى ينشف ويزال بالليفة المغربى ويجب ترطيب الجسم بعد الاستخدام وشطف الجسم جيدا وهذة الطريقة لكل انواع البشرة

[هاجر]

طريقة تحفة بإستعمال ماء الترمس


المهم نقول الطريقة انا امى استخدمت معايا الطريقة دى من وانا فى سن ال18 كدة والحمد للة باى باى شعر وكل الناس اللى قلتلهم عليها انبهروا بالنتيجة رغاية صح المهم عارفين الترمس المر المطحون تروحوا عند العطار اى عطار وتقولولة عايزين ترمس مر واطحنة مش صعبة المهم يكون مر علشان فى نوعين مر وعادى المهم نجيب الترمس ونحط علية 3 كوبايات مية مغلية ونغطية لمدة يوم كامل وبعدين ناخد المية ونصفيها ونجيب علبة رشاش فاضية زى بتاعة الجلانس عارفينها المهم بعد يا حلوين مانشيل الشعر بالطريقة التقليدية لازم التقليدية كل يوم نرش الاماكن اللى شيلنا منها الشعر اى مكان فى الجسم ونسيب المية لغاية ما تنشف ومش لازم تغسليها عادى بس لازم كل يوم اوعوا تكسلوا لغاية الشعر الجديد ما يطلع ونشيلوا برضة بالطريقة التقليدية ونرجع نرش الترمس وهكذا وبعد 3 مرات ادعولى هتقولوا باى باى للشعر طول العمر بس الوقت بيختلف من بشرة لبشرة حسب غزارة وسمك الشعر المهم متكسلوش وهتنبهروا بالنتيجة وكمان البياض علشان الترمس تحفة لتفتيح البشرة والمرارة بتدمر بصيلة الشعرة وادعوا لولدتى بطول العمر والصحة

[هاجر]

لنعومة وكثافة الشعر مع كل غسلة


لنعومة وكثافة الشعر مع كل غسلة

الطريقة دى جميلة جدا للناس اللى بتكسل تعمل حمامات زيت بنعمل خلطة بسيطة جدا بتتضاف على زجاجة الشامبو ونتيجتها بتبان فى خلال شهر بالكتير من حيث النعومة والكثافة وقلة سقوط الشعر
المكونات
2 معلقة زيت خروع + 2 معلقة جنين القمح الاصلى
الطريقة يخلطوا جيدا ويوضعوا فى زجاجة الشامبو ومع كل غسلة هتشوفى الفرق
بنات زيت جنين القمح الاصلى متوافر وسعرة كويس انا بجيب زجاجة 15 مللى من شركة اسمها الكابتن بتتباع عند كل العطارين وفى نوع اسمة اصالة وفى انواع كتير وهبقى اقولكم على فوايد زيت جنين القمح بالتفصيل فى موضوع تانى المهم الزجاجة دى ب 4 جنية ونصف بتقعد معايا شهر علشان انا بدهن منها وشى كل يوم بالليل لان زيت جنين القمح بيمنع التجاعيد

[هاجر]

ماسك قنبلة من اول مرة بتتصدمى

هاى يا قمرات عندى ليكم ماسك من اول مرة واللة العظيم هتتصدموا من النتيجة المهم ندخل فى الموضوع على طول تجيبوا 3 قشور موز اة قشور وبططساية مسلوقة بقشرها ونص لمونة بقشرها وكوب لبن وتضربوا كل دة فى الخلاط كويس قوى على فكرة الكمية دى هتكفيكى اسبوع هيتكون عندك سائل بنى هو دة القنبلة المهم هتجيبى شوية منة تدعكى بيهم وشك او اى منطقة فى جسمك عايزاها تبيض لمدة 3 دقايق وبعدين حطية ماسك لمدة نص ساعة واشطفى وشك بعدها او جسمك واوعى تتخضى من النتيجة تحفة وربنا شاهد على كلامى اقولك تحفة لية الموز فية كمية حديد بتتركز فى القشرة رهيبة بتفتح وتمنع التجاعيد البطاطس معروفة بانها بتفتح البشرة ومنطقة تحت العين برضة بطريقة رهيبة وطبعا الليمون مش عايز كلام المهم الباقى من الماسك حطية فى برطمان زجاج علشان الموز بيتاكسد مع البلاستيك وممكن يكفيكى اسبوع لو لوشك بس ولو للجسم هيقعد 3 ايام الماسك دة ممكن تستخدمية لاى منطقة فى الجسم اى منطقة فيها غمقان فاهمين المهم تدعكى 3 دقايق وتحطية نص ساعة ماسك ومن جمالة مش هتقدرى تستغنى عنة

[هاجر]

مفاجأة المركز .. خلطة خاصة للعرائس

خلطة العرائس


وانتوا كلكم لازم تجربوها مش لازم العرايس بس متكسلوش هتلاقوا نتايج تحفة متنسوش بقى تدعوا للبنت الخلطة دى والله العظيم سر من اسرار ستات اسوان بيستخدموها للعرايس وشوفى الجسم اللى بيلمع المنور واللون الموحد ووالله العظيم البياض تلاقوا الواحدة قبل الفرح سمرا ويوم الفرح لمبة ونقعد نقول من اية المهم متكسلوش المكونات بسيطة ورخيصة ويالة الصيف على الابواب قصدى افراح الصيف ويالة بنات المنتدى الحلوين يستعدوا وربنا يخليكم اجمل النساء فى عين ازواجكم يارب والمتزوجين بقى يالة اعملوا نيو لوك كدة طبيعى من البيت خلى جوزك ياروح الشغل واهتمى بنفسك كدة يالة جربوا وانا معاكم وكنت صحيح عايزة اسال هو انا المفروض اكتب كام موضوع فى اليوم يعنى ياريت المشرفين يعملولى استثناء ربنا يكرمكم علشان الحق اكتب كل اللى عندى علشان الصيف والعرايس
المكونات
1كوب ارز مطحون اى رز واطحنية كويس زى البودرة طبعا دى حاجة عادية رخيصة وسهلة واللى بتكسل تروح لاى عطار وتديلة كيلو رز وتقولة اطحنة بيطحنة بجنية والرز مش للخلطة دى بس فى ماسك بشع من الرز ابقوا فكرونى اكتبة يعنى الكيلو هنستفاد بية احلى استفادة
نص كوب طحينة اى نوع طحينة سايبة الرشيدى او الكيس اى نوع
عصير 2 لمونة
نص كوب زيت زيتون
الطريقة
تخلط المكونات جيدا مع بعض ولو حسيتى الخلطة تقيلة زودى الزيت علشان كل واحد بيحب السماكة بتاعة الخلطة مختلفة عن التانى المهم تخلطيها كويس وتوضع على كامل الجسم ساعتين لغاية ما تنشف وافركى قطعة قطعة بطريقة دائرية مع عقارب الساعة انا بصراحة بستخدم الليفة المغربى فى الفرك وانا شرحتلكم طريقة سهلة لعمل الليفة فى البيت المهم افركى وبعدين اشطفى جسمك واتفرجى

[هاجر]

عايزة خدود نانسى عجرم ونوال الزغبى تعالى بسرعة


السلام عليكم طبعا مين فينا مش عايزة خدودها منفوخة من غير عمليات تجميل عندى ليكم طريقتين تحفة واستخدميها كمان لنفخ الشفايف وجربوا وانا معاكم علشان اشوف فرحتكم من النتيجة انا وشى بقى بطة وانتوا لا خلاص هقول عندكم طريقتين واحدة جربتها والتانية جربتها على بنت اختى والاتنين نفس النتيجة الحمد للةوبرضو هقولكم متنسوش تدعوا للوالدة علشان هى زمان كانت مصاحبة واحدة سودانية اللة يرحمها عرفتها اسرار تحفة للبشرة والشعر طبعا انتوا زهقتوا خلاص هقول الطريقة الاولى الحلبة الناشفة تغلى معلقتين حلبة فى نص كوب ماء وبعدين تحطيها فى التلاجة علشان الريحة تروح وتاخدى مية الحلبة وتعجنى بيها معلقة خميرة فورية او قطعة بحجم الليمونة من الخميرة العادية وتعملية ماسك على خدودك وشفايفك لمدة نص ساعة وبعدين اغسلى وشك بمية فاترة الماسك دة تعملية يوميا وتوقفية لما توصلى للحجم المطلوب هستنا ردكم وبعدين اقولكم على الطريقة التانية وباى يا قمرات بكرة تبقوا قمرات بخدود كمان

[نجمة]

يسلمو على الموضوع

يعطيك الف عافية

تحياتي نجمة

[هاجر]

merci najma

[حورية بغداد]

الف شكر لك اختي هاجر على الموضوع المتعوب عليه....
الله يعطيك العافية و لا تحرمينا من مواضيعك الحلوه



تحياتي

[Proudly UAEian]

بصراحة موضوع رائع

اخذت منه كم وصفة

تسلمين على مجهودك

تحياتي

[الطفلة الشقية]

يسلمووووووووووووووووووووو و

[hanouda]

مرسي على الموضوع الرائع
يسلمو ننتظر جديدك

[قيسون]

tankkkkkkkkkssssssssssss

[هاجر]

merci a vouuus

[هاجر]

اول سر لشعر تحفة ناعم وبيلمع



خلينا ندخل بقى شوية على الشعر عندى ليكم باذن اللة طريقة لسقوط الشعر وتقويتة وتلميعة وبرضة هتحسى الفرق من تانى استخدام المهم البنات المحجابات زيى كدة يارب يعنا جميعا على طاعة اللة فى مقولة بتقول ان الحجاب بيوقع الشعر لالالالالالا مش الحجاب يا قمرات نوع الحجاب وعدم تهوية الشعر اولا ابعدى عن الحجابات المصنوعة وحاولى بقدر الامكان تشترى القطن او على الاقل القطن المخلوط بنوع تانى ولازم لازم تهوى شعرك كل يوم على الاقل ساعتين يعنى لو غسلتى شعرك خلية مفرود شوية متلمهوش على طول ولو مغسلتهوش قبل النوم كل يوم سرحى شعرك التسريح بيحرك الدورة الدموية لفروة الراس وكدة يمنع السقوط وسبية مفرود شوية طبعا دة مع الطريقة اللى هقولكم عليها وان شاء اللة شهر وهتلاقى ان سقوط الشعر قل جدا وزادت لمعتة وبقى حيوى جدا يا بنات طبيعى ان العر بيسقط بمعدل مية شعرة يوميا اكتر من كدة لازم ناخد بالنا الشعر نعمة وتاج المراة طبعا هتقولوا رغاية انا نفسى اقولكم على كل حاجة وان شاء اللة هقولكم على حمامات شعر تحفة كفاية رغى الطريقة هاتى بيضتين واضربيهم شوية بالشوكة وحطيهم فى زجاجة الشامبو ورجيها جامد جامد وكل مرة تغسلى شعرك رجيها وبس طبعا فى منكم هيقول الريحة جربى مفيش ريحة ولا هتحسى اصلا بالبيض اى نوع شامبو بانتين دوف جونسون اى نوع جربى وانا معاكى وهنشوف النتيجة وشوفى شعرك وادعيلى وهقولكم سر من اسرار الاندوسيات طبعا عارفين شعرهم بيكسروا البيضة ويحطوها على شعرهم ساعة علشان شعرهم يفضل يلمع ويبقى تقيل زى ما بتشفوة ونفضل نبص عليهم ونتحسر ههههههههه ادينا عرفنا السر يالة بسرعة جربوا

[هاجر]

سر .سر .سر بسرعة تعالو اقولكم علية



هو نبات السدر وهو رخيص جدا بنجيبة من عند العطار ونطحنة كويس كويس لغاية ما يبقى زى البودرة وهو بيبيض الجسم والوجة جدا جدا ولية طريقة للجسم وطريقة للوجة وطريقة للشعر
لتبيض الجسم بصورة رهيبة
3 ملاعق بودرة السدر
3 ملاعق حليب بودرة نيدو مثلا او اى نوع
كوب مية سخنة يتم خلط المكونات جيدا جيدا ودهن الجسم بهم لمدة ساعتين لغاية ما تنشف وبعدين نشيلها بطريقة الفرك او بالليفة المغربية وهتتفرجوا على النتيجة بعد كام استخدام بسيط يعنى 3 او اربع مرات تبيض ونعومة وازالة الخلايا الميتة وتقشير الجسم
لتبيض وتنوير الوجة
تاخدى القليل من بودرة السدر فى كف اليد وتحطى عليها شوية مية دافية وتدعكى الوجة جيدا بها لمدة دقايق ثم اشطفى الوجة عادى والطريقة دى رغم سهولتها تحفة بجد
لتساقط الشعر
خلط معلقتين من بودرة السدر مع معلقة زيت زيتون ومعلقة ماء ووضعها على الشعر نص ساعة ولكن ليها عيب واحد برغم انها بتمنع سقوط الشعر نهائيا الا انها تؤدى لتجعيد الشعر زى الكيرلى وعلى فكرة فى ناس بتستخدمها علشان شعرهم يبقى كيرلى طبيعى

[هاجر]

سر جمال بشرة هالى بيرى الممثلة الامريكية




عايزين تعرفوا سر جمال بشرة هالى بيرى عندما سالتها اوبرا وينفرى المذيعة المشهورة عن سبب تالق بشرتها ونعومتها وتوحد لونها برغم انها سمراء وان بشرتها هذة جعلت الكثير من نجمات هوليوود يحسدونها عليها فضحكت هالى بيرى وقالت ان السر تعلمتة من والدتها وجدتها ولا تستغنى عنة وهو الخوخ فهى تقوم بعمل ماسك للوجة واسكراب للجسم مرتين اسبوعيا من الخوخ 0000000 واليكم الطريقة طبعا هالى بيرى مقلتش الطريقة انا هقولكم الطريقة والحمد للة عن تجربة فالخوخ يتمتع بخاصية شديدة فى تجميل البشرة ويدخل فى عدد كبير من الماسكات وكريمات التقشير ويعمل الخوخ على شد البشرة ومنع ظهور التجاعيد المبكرة واعطاء البشرة لون وردى جميل وتحسين لونها وازالة بقع حب الشباب واثار البثور والجروح وتوحيد لون البشرة الطريقة هاتى خوختين طريين جدا واهرسيهم بالشوكة كويس وحطى عليها نص معلقة عسل صغيرة وحطية على الوجة نص ساعة دة للبشرة الحساسة نفس الطريقة خوختين وحطى عليهم معلقتين لبن واهرسيهم كويس وحطية نص ساعة دة للبشرة العادية نفس الطريقة خوختين وحطى عليهم معلقة مية ورد ونقطتين لمون وحطية نص ساعة دة للبشرة الدهنية وبعدين اغسلى وشك بماء دافى وبعدين ماء بارد 0000 انا مبهرس الخوختين بالشوكة بضربهم فى الخلاط بعد مااشيل القشرة براحة جدا هى بتتشال بسهولة مادام الخوخة طرية بحس الخلاط بيخليهم احسن عموما جربوا واللى يريحكم اعملوة 0000 اما عن طريقة السكراب او المقشر بالخوخ هاتى 4 خوخات طراى وشيلى القشرة بالراحة واضربيهم فى الخلاط وبعدين حطى عليهم 8 ملاعق سكر وافركى جسمك فى اتجاة عقارب الساعة وسبية 10 دقايق وبعدين اغسلى جسمك الجميل فى المقشر دة ان من اول مرة هتحسى بالنعومة والانتعاش وتحسى بشرتك بتتنفس او تحسى انها ساقعة يا قمرات مفيش احسن من الطبيعى الكريمات الغالية فعلا بتجيب نتيجة فى الاول لكن بعدين بترجع البشرة زى ماهى واكيد جربتوا وشفتوا دة غير نسبة الكرتيزون والزئبق اللى فى الكريمات دى

[هاجر]

الحمــــــــــــــــــــا م المغربـــــــــــــــــــ ــي


الحمام المغربى يعتبر من اجمل انواع تنضيف الجسم والتخلص من الخلايا الميتة المتراكمة على الجسم واستخدامة باستمرار بيفتح البشرة ويوحد لونها بصورة رهيبة واهل المغرب بيداموا على الحمام دة كل اسبوع ولكن عندنا فى مصر بيتعمل فى مراكز التجميل واغلب اللى بيعملوة العرايس علشان اسعارة بتكون غالية وانا النهاردة هقولكم على طريقة الحمام المغربى باسهل الطرق واسهل المواد المستخدمة وهنستخدم اكتر من بديل للمنتجات المستخدمة اللى بتجيب نفس النتيجة ويمكن احسن كمان وبلاش نجرى وراء اعلانات مراكز التجميل اللى هدفها الربح فقط يعنى لما يقولوا مينفعش تستخدمى غير الصابونة المغربية السودة اللى تمنها فوق 100 جنية يبقى ازاى يعنى اى حاجة تانى متنفعش ... هو دة كلام المراكز التجميلية اللى مش عايزة غير الربح المادى بس المهم هنعمل اكتر من طريقة والله لافرق حتى اسالوا مجرب ونشوف المكونات اللى عايزينها للحمام المغربى
المكونات
ليفة مغربى بتتباع فى الصيدليات على شكل جوانتى ب 21 جنية وفى نوع ب 33 مفيش فرق بينهم وفى فى الدول الخليجية نوع من بودى شوب برضة جوانتى او قفاز برضة نفس النتيجة والناس اللى معندهاش فى طريقة رخيصة ونفس النتيجة وممكن تكون احسن كمان العطار اللى هتشترى منة المكونات قوليلة عايزة قطعة خيش من اللى بيحطوا فية العطارة عارفينة الخيش البنى المهم تجبيها وتخيطيها على شكل مربع مزدوج علشان تدخلى ايديكى جوا
الصابون المغربى السايل بيتباع عند بعض العطارين المشهورين زى حراز هو اسمة صابون مغربى سايل حبايبى ملقتوش مش مشكلة كل مراكز التجميل معندهاش وشوفوا بيستخدموا اية هاتى صابونة لوز او صابونة زيت زيتون او صابونة بابايا او صابونة كركم كلهم عند العطارين وسعرهم مبيعديش 10 جنية وفى ب5 جنية المهم ابشروها فى المبشرة اليدوية عارفينها بتاعة البصل بتاعة زمان المهم بعد البشر هاتى الصابون وحطية فى حلة وعلية نص كوب ماء ورد واتركية طول الليل الصبح حطية على النار شوية وقلبى لغاية الصابون ماتلاقية زى الكريم بالضبط
حنة ورق برضة عند اى عطار واطحنيها لغاية ماتبقى زى البودرة فى مطحنة الخلاط لو ملقتيش مطحون قولى للعطار عايزة نوع حنة سايب يكون صافى متخفيش العطارين لما بيلقوكى فاهمة بيدوكى طلبك من غير غش بس الاول اطلبى الحنة الورق الناشفة موجودة عند العطارين الكبار زى حراز والشمس فى الحسين
عصير اربع لمونات واى حمام كريم لشعرك زيت طبيعى بيو بوينت اى نوع بتستريحيلة بس انا بفضل زيت زيتون وزيت خروع وتدفيهم على النار علشان الشعر يشربهم وكمان بونية محكم للشعر
اى مرطب للجسم انا بفضل كريم جليسوليد الاحمر الاصلى هو جلسريين مجمد العلبة الصغيرة ب6 والكبيرة ب11 جنية واعصر عليها لمونة للصغيرة ولمونتين للكبيرة او جلسريين شفاف وعلية لمونة او بيبى جونسون اويل طبعا انا بقولكم الحاجات اللى فى متناول ايدينا وبتجيب نفس النتيجة واحسن وصدقونى العلب المستوردة اللى فى مراكز التجميل جواها حاجات طبيعية مخلوطة بجزء من الكريم
حجر للقدم بيتباع عند العطارين او فى طبى فى الصيدليات اللى يريحكم يا بنات استخدموة
طريقة الحمام المغربى بالتفصيل
اولا افتحى الدوش فى الحمام على الماء الساخن جدا واقفلى الابواب والشبابيك علشان البخار وادخلى الحمام وانتظرى حتى يملؤة البخار اعملى حمام الزيت او الكريم لشعرك والبسى البونية وخدى بالك متخليش زيت حمام الشعر ينزل على جسمك وانتظرى 10 دقايق فى البخار علشان المسام تفتح واملى البانيو بالماء الساخن وانزلى فية ربع ساعة لو معندكيش بانيو افتحى الدوش ربع ساعة على جسمك وبعدين اطلعى من البانيو وهاتى الصابون اللى عملناة السايل وحطى علية عصير الليمون والحنة البودرة اللى طحناها واخلطيهم كويس وادهنى جسمك كلة كويس بالصابون واقعدى نص ساعة فى الفترة دى اعملى ماسك للوجة اى ماسك كويس بتستريحيلة وبعد النص ساعة ادعكى الصابون من جسمك بايديكى مش بالليفة بحركة دائرية فى اتجاة القلب يعنى لاعلى ادعكى جسمك دائريا لاعلى وبعدين انزلى تحت الدوش الساخن واغسلى الصابون وبعدين بالليفة المغربى ابداى فرك الجسم جزء جزء بحركة دائرية بالضغط على البشرة ولكن بلطف برضة لاعلى فى اتجاة القلب لتنشيط حركة الدم وتدفقة ولزيادة سرعة الاكسجين فى الجسم وبعدين ادخلى تانى تحت الماء الساخن واغسلى جسمك مرة تانى ونشفية كويس وبعدين ادهنى جسمك كلة بالكريم الجليسوليد المضاف الية عصير الليمون او الجلسرين السايل او البيبى اويل وانتظرى ربع ساعة واثناء الانتظار قومى بدعك لقدم والاصابع بالحجر جيدا الجلسريين هيسعدك كويس وبعدين ادخلى تحت الدوش واغسلى شعرك وجسمك وياريت تغسلى شعرك بنوع شامبو خفيف زى بيبى جونسون وسيبى الشامبو ينزل على الجسم من غير استخدام الليفة وبايديكى نزلى الجلسرين الزائد على الجسم وبعدين نشفلى جسمك وشعرك وشوفى النتيجة ولو استمرتى كل 15 يوم على الحمام دة هتشوفى فرق كبييييييييييييييير جدا فى البشرة وتوحيد لون الجسم واختفاء البقع ويابنات نادى واحدة من اخواتك او مامتك تدعكلك ضهرك بالليفة لو مش طايلة وهتشوفى الجلد الميت وهو بينزل معاكى فى الليفة ........ انا بقول ان احنا نعمل كل حاجة فى البيت لان حرام ان احنا نروح مراكز التجميل وواحدة تعملهولنا لان رؤية المراة للمراة حرام

[هاجر]

لتنعيم الشعر

طريقة هايلة جدا لتنعيم الشعر وفردة
التنعيم من اول مرة والفرد بعد كذا استخدام منتظم
المقادير
فنجان قهوة سمسم متحمص يعنى اشترى السمسم وحمصية فى طاسة وبعدين اطحنية زى البودرة + علبة زبادى + معلقتين مايونيز
الاستخدام
ضعى الخليط على شعرك ساعتين والبسى بونية وبعدين اغسلى شعرك عادى جدا وانتظمى على استخدامها مرة فى الاسبوع ان شاء الله هتحسى ان تجاعيد الشعر بتقل جدا ومرة بعد مرة بتلاقى شعرك بيتفرد
و اقولكم ان ماسك المايونيز لوحدة كمان هايل هايل هايل جدا ضعية على شعرك ساعتين والبسى بونية واعملى حمام ساخن على البونية بالسشوار او بفوطة ساخنة واتفرجى على النتيجة



طريقة هايلة جدا لتنعيم الشعر وفردة
التنعيم من اول مرة والفرد بعد كذا استخدام منتظم
المقادير
فنجان قهوة سمسم متحمص يعنى اشترى السمسم وحمصية فى طاسة وبعدين اطحنية زى البودرة + علبة زبادى + معلقتين مايونيز
الاستخدام
ضعى الخليط على شعرك ساعتين والبسى بونية وبعدين اغسلى شعرك عادى جدا وانتظمى على استخدامها مرة فى الاسبوع ان شاء الله هتحسى ان تجاعيد الشعر بتقل جدا ومرة بعد مرة بتلاقى شعرك بيتفرد
و اقولكم ان ماسك المايونيز لوحدة كمان هايل هايل هايل جدا ضعية على شعرك ساعتين والبسى بونية واعملى حمام ساخن على البونية بالسشوار او بفوطة ساخنة واتفرجى على النتيجة